ថៃ៖ ព្រះមហាក្សត្រថៃបានឡាយព្រះហស្ថលេខា និងអនុម័តច្បាប់ស្ដីពីអាពាហ៍ពិពាហ៍ដែលរដ្ឋសភាថៃបានអនុម័តនៅដើមឆ្នាំ២០២៤នេះ ដែលនាំឱ្យថៃក្លាយជាប្រទេសដំបូងគេបង្អស់នៃតំបន់អាស៊ីអាគ្នេយ៍ និងជាប្រទេសទី៣ ក្នុងទ្វីបអាស៊ីដែលមានច្បាប់ទទួលស្គាល់អាពាហ៍ពិពាហ៍នៃគូស្នេហ៍ដែលមានភេទដូចគ្នា។

ការអនុម័តច្បាប់នេះពីព្រះមហាក្សត្រ ត្រូវបានចុះផ្សាយក្នុងព្រះរាជក្រមនៅល្ងាចថ្ងៃអង្គារម្សិលមិញ ដែលមានន័យថាច្បាប់នេះបានចូលជាធរមាន និងអាចអនុវត្តបាននៅរយៈពេល ១២០ថ្ងៃបន្ទាប់ ពោលគឺនៅថ្ងៃទី២២ ខែមករា ឆ្នាំ២០២៥។ គួរបញ្ជាក់ថា ច្បាប់នេះបានលេចចេញរូបរាងផ្លូវការ បន្ទាប់ពីមានការខិតខំប្រឹងប្រែងរាប់សិបឆ្នាំពីក្រុមសកម្មជនអ្នកស្រឡាញ់ភេទដូចគ្នាក្នុងប្រទេសថៃ និងត្រូវបានព្រឹទ្ធសភាអនុម័តកាលពីខែមិថុនាកន្លងទៅ។ 

កន្លងមក ថៃត្រូវបានគេទទួលស្គាល់ និងជាគោលដៅទេសចរណ៍ដ៏ពេញនិយមបំផុតមួយនៃទ្វីបអាស៊ី ដែលគេដឹងថាប្រទេសនេះមានបរិយាកាសអំណោយផល និងមានភាពបើកទូលាយដល់ក្រុមអ្នកស្រឡាញ់ភេទដូចគ្នា (LGBT)៕